告訴我 每天都要讓自己大笑三聲．．．．有益身體健康唷！！！！

14,406愛的鼓勵 39訂閱站台

阿爸伊那咧唱，阮後生嘛綴咧咿咿哦哦，

一个是愈唱愈歡喜，一个是愈哦愈大聲。

 

 

人講：「老人三步壞，哈唏流目屎、放尿兼尿滯、放屁兼滲屎。」

 

但是嘛有人講：「老人有三好，顧家好、顧孫好，猶閣有，死好！」

 

人一出世著行向死亡，只是壽命長底的問題而已，身體健康的人，不但無三步歹，真正是顧家好、顧孫好。但是老人是毋是，死好？

 

慈濟證嚴法師講：「人老來有三好，經驗豐富好、健康長壽好、走入社會當志工好。」

 

人講家內有一老親像有一項寶，呣干礁是顧家好、顧孫好而已，伊人生的經驗真正是提供下一代上好的寶。

 

當然身體那健康，會當再行入社會做志工，無私的奉獻真正是國家社會的寶！

 

但是身體若無好，就袂當閣行入社會做志工嗎？毋過嘛無是「死好」啊！

 

記得查某囡度晬進前，家己佮嫷某仔攏佇台南工作，囡仔留佇屏東予阿爸阿母「含飴弄孫」，禮拜日才是佮囝仔鬥陣的日子。

 

若是佮嫷某的帶著查某囡去公園裡佚陶的時陣，嫷某仔攏會教伊叫爸爸，甚至閣講甲「字正腔圓」的講：「爸～～爸！」

 

查某囡攏是舞著雙手，咿咿呀呀，但是一聲爸爸嘛無叫出來。

 

但是若入門就叫：「爺～．爺呀」竟然先學會曉叫爺爺。

 

查某囡是阿爸第一个孫，阿爸上疼愛規工唱歌予伊她聽閣佮伊講話，先會曉叫爺爺是應該的。

 

每回若帶伊出門，看著公園裡抑路裡，她攏會伸伊的手規面無歡喜的表情講：「別人爺爺載娃娃！別人爺爺載娃娃！」

 

自從彼年阿爸的跤頭趺害去了後，就毋捌載伊出門過。會當佮別人的囡仔仝款，予家己的阿公用車載出來佚陶，是伊小小的心靈上最大的願望。

 

後來幫阿爸買一台「殘障代步車」，只要阿爸出門伊就是當然的乘客，阿公終於可以載娃娃出門矣。

 

有一仝轉去庄跤，拄著一位序大。

 

足懸輩份的序大，伊講我愛叫伊叔公祖，伊是阮叔公的阿叔。人攏叫伊鴨仔叔，所以我愛叫伊鴨仔叔公祖。

 

鴨仔叔公祖講阮阿爸細漢的時陣，足厚話擱足愛唱歌，閣不時唱甲著等。

 

因細姨嬤不時帶伊去唱歌比賽，若欲出門攏先帶來我的甘仔店食糖仔，若唱有著等著帶去旗山佚陶己幾落日。

 

阮後生出世的時陣，阮老爸身體已經無蓋好無法度閣出門，若咧顧孫騙孫仔攏唱歌予孫仔聽。

 

伊那咧唱，阮後生嘛綴咧咿咿哦哦，一个是愈唱愈歡喜，一个是愈哦愈大聲。

 

現在阿爸已經往生幾落年，阮後生嘛國中二年矣。伊嘛足愛唱歌擱足厚話，電視若咧唱伊嘛對咧唱，那無唱歌話就講袂煞！

 

厝邊攏講伊足成我，足皮、白目閣厚話。哎，其實伊成阮阿爸，聰明、開朗、閣愛唱歌。

 

老人真正是厝內的寶，袂當出門做志工，但是想辦法顧孫兼顧厝，嘛是真快樂啊！生老病死是人生的過程，「死好！」是對老人的無尊敬。

 

有一位社會賢達講，友孝是做人的「權利」，敬老尊賢應該嘛是啊，因為老人真正是「顧家好、顧孫好、經驗豐富好。」

 

刊載於「海翁台語文學雜誌」第84期（2008.12），p.50。